დღეიდან ერთ სივრცეში გაერთიანებული გამარტივებული სახელმწიფო სერვისებით სარგებლობა კახეთის რეგიონის მცხოვრებლებსაც შეეძლებათ - 2012 წლის 12 ივნისს, გურჯაანში იუსტიციის სახლი საქართველოს პრეზიდენტმა მიხეილ სააკაშვილმა გახსნა. საზეიმო ცერემონიაში მონაწილეობდნენ ადგილობრივი თვითმმართველობის წევრები, მედიის წარმომადგენლები, სხვა მოწვეული სტუმრები.

საქართველოს პრეზიდენტმა გურჯაანელებს მათ ქალაქში იუსტიციის სახლის გახსნა მიულოცა. მიხეილ სააკაშვილმა ქართულ რეფორმებზე ისაუბრა და ერთ-ერთ ყველაზე წარმატებული პროექტად იუსტიციის სამინისტროს ბრენდი - იუსტიციის სახლები დაასახელა. დღესვე საქართველოს პრეზიდენტმა ადგილობრივ სტუდენტებს სტუდენტური ფასდაკლების ბარათები გადასცა. სტუდენტური ბარათები იუსტიციის სახლებსა და სამოქალაქო რეესტრის ოფისებში 11 ივნისიდან გაიცემა.

ცერემონიის ოფიციალური ნაწილის დასრულების შემდეგ, ზეიმი კონცერტით გაგრძელდა - იუსტიციის სახლის გახსნა გურჯაანელებს ზუმბამ მიულოცა.

გურჯაანის იუსტიციის სახლის მომხმარებლები სერვისცენტრში ყველა იმ მომსახურებას, 250-მდე სერვისს მიიღებენ, რომელსაც იუსტიციის სახლები აერთიანებს. აქვე იმუშავებს იუსტიციის სამინისტროს ახალი პროექტი - ლიდერთა სახლიც.  სკოლის დამამთავრებელი კლასების მოსწავლეების სოციალური პასუხისმგებლობის ამაღლებისა და სამოქალაქო აქტივობის ზრდისათვის ახალგაზრდა ლიდერები მოსწავლეებს საინტერესო და მარავლფეროვან აქტივობებს იუსტიციის სახლის სივრცეში შესთავაზებენ. გურჯაანელი მოსწავლეებისთვის მოეწყობა სპორტული და შემეცნებითი შეჯიბრებები, კინოჩვენებები, საინტერესო ადამიანებთან შეხვედრები. იუსტიციის სახლი მასპინძლობას გაუწევს მრავალ საინტერესო ღონისძიებას.

გურჯაანის იუსტიციის სახლის პროექტი ქართველ არქიტექტორს ირაკლი შარაშიძეს ეკუთვნის. მისი მშენებლობა 2011 წლის სექტემბერში დაიწყო და ათ თვეში დასრულდა. შენობა სრულ შესაბამისობაშია თანამედროვე სტანდარტებთან.

იუსტიციის სახლი - იუსტიციის სამინისტროს სერვისების სრულიად ახალი კონცეფციის მქონე საჯარო დაწესებულებაა, სადაც სამოქალაქო რეესტრის სააგენტოს, საჯარო რეესტრის ეროვნული სააგენტოს, ეროვნული არქივის, აღსრულების ეროვნული ბიუროს, ნოტარიუსთა პალატის  სერვისები არა  მექანიკურად, არამედ - იდეურად და სისტემურად არის გაერთიანული. მყუდრო, სასიამოვნო და კომფორტული გარემო,  მაღალკვალიფიციური, კომპეტენტური და კეთილგანწყობილი პერსონალი  მომხმარებელთა  თავაზიან, სწრაფ და ხარისხიან მომსახურებას უზრუნველყოფს.

საქართველოში პირველი იუსტიციის სახლი 2011 წლის 26 მაისს, ბათუმში გაიხსნა და ის თანამედროვე საქართველოს რეფორმებისა და აღმშენებლობის სიმბოლოდ იქცა. იუსტიციის სახლის გამარტივებული სერვისებით სარგებლობა ბათუმში, რუსთავში, მესტიაში, ქუთაისსა და ოზურგეთშიც არის შესაძლებელი, დღეიდან კი მათ რიცხვს გურჯაანიც შეემატა. 2012 წლის ბოლომდე იუსტიციის სახლები ახალციხეში, თელავში, გორში, მარნეულსა და თბილისში გაიხსნება.

ერთი წლის განმავლობაში იუსტიციის სახლები ათასამდე უცხოურმა დელეგაციამ დაათვალიერა. სულ რამდენიმე დღის წინ კი, აშშ სახელმწიფო მდივნის ჰილარი კლინტონის საქართველოში ვიზიტისას, მიღებული იქნა გადაწყვეტილება წარმატებული ქართული რეფორმა სხვა ქვეყნებშიც დაინერგოს - ამ პროცესში საქართველოს პარტნიორობას ამერიკის შეერთებული შტატები გაუწევს.