თსუ-ის სტუდენდები “საკანონმდებლო მაცნეს” ახალ სერვისს გაეცნენ
22 მაისს, „საკანონმდებლო მაცნეს" თავმჯდომარე გიორგი წიკლაური თბილისის სახელმწიფო უნივერსიტეტის სტუდენტებს ესტუმრა. გ. წიკლაურმა მათ „საკანონმდებლო მაცნესა" და შემოსავლების სამსახურის ერთობლივი სერვისი გააცნო.
შემოსავლების სამსახურისა და საკანონმდებლო მაცნეს" ერთობლივი პროექტის ფარგლებში საგადასახდო კოდექსი, გამომდინარე დოკუმენტებთან და დეტალურ კომენტარებთან ერთად საიტზე matsne.gov.ge განთავსდა. გ. წიკლაურის თქმით, გამარტივებული საძიებო სისტემა მნიშვნელოვნად გაუადვილებს ქართველ ბიზნესმენებს საკანონმდებლო ბაზის მოხმარებას საკუთარ საქმიანობაში, კომენტარები კი ამა თუ იმ, მათთვის ბუნდოვანი საკითხების გარკვევაში დაეხმარება.
„საკანონმდებლო მაცნეს" თავმჯდომარე სტუდენტებს იმ ახალი პროექტების შესახებაც ესაუბრა, რომლებიც უწყებაში ხორციელდება. მიაწოდა ინფორმაცია საქართველოს კანონმდებლობის ინგლისურენოვანი ბაზის შექმნის მიზნით მთარგმნელობითი ცენტრის ფორმირების თაობაზე, განუმარტა, რა უპირატესობა აქვს კანონის ოფიციალური უცხოენოვანი ვერსიის ხელმისაწვდომობას.
შეხვედრის ბოლოს გიორგი წიკლაურმა სტუდენტების შეკითხვებს უპასუხა.
საზოგადოების სხვადასხვა ფენების უკეთ ინფორმირების მიზნით შეხვედრები მომავალშიც გაგრძელდება. მათი მიზანი „საკანონმდებლო მაცნეს" საიტის პოპულარიზაციაა. 2011 წლიდან „საკანონმდებლო მაცნე" მოქალაქეებს გამარტივებულად სთავაზობს ელექტრონულ სერვისებს. ვებ-გვერდზე კანონებისა და ნორმატიული აქტების გამოქვეყნება ამ ინფორმაციით სარგებლობის საშუალებას ნებისმიერ მსურველს აძლევს, ელექტრონული ბაზა კანონმდებლობის ბეჭდურ ვერსიას ეტაპობრივად ჩაანაცვლებს.
26 მაისისადმი მიძღვნილი ღონისძიებები თბილისსა და 26 ქალაქში გაიმართება
26 მაისისადმი მიძღვნილი ღონისძიებები თბილისსა და 26 ქალაქში გაიმართება. ღონისძიებები 12:00 საათიდან 21:30 საათის ჩათვლით გაიმართება. თბილისში ღონისძიებები 3 ადგილას - რუსთაველის და თავისუფლების გამზირზე, გლდანში და ვარკეთილში გაიმართება.
თბილისის გარდა საზეიმო ღონისძიებები შემდეგ ქალაქებში გაიმართება: ამბროლაური, ახალქალაქი, ახალციხე, ახმეტა, ბათუმი, ბოლნისი, ბორჯომი, გარდაბანი, გორი, დუშეთი, ზუგდიდი, თელავი, ლანჩხუთი, მარნეული, მესტია, მცხეთა, ოზურგეთი, რუსთავი, საჩხერე, სენაკი, სიღნაღი, ფოთი, ქუთაისი, ყვარელი, ცაგერი და წალკა.
ღონისძიებებს 21:30 საათზე, როგორც თბილისში, ასევე 26 ქალქში საქართველოს ეროვნული ჰიმნი და გრანდიოზული ფოიერვერკი დაასრულებს.
ქართული დელეგაცია ნორვეგიის სისხლის სამართლის საქმეთა გადასინჯვის კომისიის მუშაობას ეცნობა
საქართველოს დელეგაცია ნორვეგიის დედაქალაქ ოსლოში სამუშაო ვიზიტით იმყოფება. აღმასრულებელი, საკანონმდებლო და სასასამართლო ხელისუფლების წარმომადგენლები ნორვეგიის სისხლის სამართლის საქმეთა გადასინჯვის კომისიის მუშაობის პრინციპებსა და პრაქტიკას ეცნობა. იუსტიციის სამინისტროდან დელეგაციის შემადგენლობაში იმყოფებიან მინისტრის მოადგილე ალექსანდრე ბარამიძე და სამინისტროს სამართალშემოქმედების დეპარტამენტის უფროსი ირინა წაქაძე.
ვიზიტის აუცილებლობა „მართლმსაჯულების ხარვეზების დამდგენი დროებითი სახელმწიფო კომისიის" შექმნამ წამოჭრა. როგორც ცნობილია, საქართველოს იუსტიციის სამინისტრომ მოამაზადა და ვენეციის კომისიაში გადააგზავნა საქართველოს კანონის პროექტი „მართლმსაჯულების ხარვეზების დამდგენი დროებითი სახელმწიფო კომისიის შესახებ". ვიზიტის ძირითადი მიზანი ამ კანონპროექტის დახვეწის მიზნით ნორვეგიული გამოცდილების მიღებაა.
დელეგაციამ უკვე გამართა შეხვედრები ნორვეგიის სისხლის სამართლის საქმეთა გადასინჯვის კომისიის მოქმედ თავმჯდომარესთან, ქალბატონ ჰელენ სეტერთან, აგრეთვე - კომისიის პირველ თავმჯდომარესთან, ქალბატონ იანე ქრისტიანსენთან. შეხვედრები გაიმართა ნორვეგიის გენერალური პროკურატურის წარმომადგენლებთან, ოსლოს უნივერსიტეტის პროფესორ ულფ სტრიდბეკთან, რომელიც ნორვეგიული კომისიის შექმნის იდეის ერთ-ერთი მთავარი ავტორი იყო.
ვიზიტის ორგანიზატორია საქართველოში ნორვეგიის სამართლის უზენაესობის მისიის (NORLAG) და გაეროს განვითარების პროგრამის წარმომადგენლობა საქართველოში.
იუსტიციის მინისტრი ''სტრასბურგის ევროპულ შეხვედრებში'' მონაწილეობს
საქართველოს იუსტიციის მინისტრი სტრასბურგში, ევროპარლამენტში, იმყოფება. თეა წულუკიანი „სტრასბურგის ევროპული შეხვედრების" მერვე კონფერენციაში იღებს მონაწილეობას. ღონისძიება ევროპის ქვეყნების საჯარო სამსახურებში ქალთა საქმიანობის პრობლემებს ეხება. საქართველოს იუსტიციის მინისტრის გარდა, მასში მონაწილეობენ ევროპარლამენტის დეპუტატი ქალები, საფრანგეთის ქალთა უფლებების სამინისტრო, ფრანგი სენატორი და სტრასბურგის ყოფილი მერი ფაბიენ კელერი, დანიის საგარეო საქმეთა სამინისტროსა და გავლენიანი ბიზნესწრეების წარმომადგენლები.
კონფერენცია მრგვალი მაგიდის ფორმატში იმართება. საქართველოს იუსტიციის მინისტრი საკითხის განხილვაში მიიღებს მონაწილეობას. დაგეგმილია, აგრეთვე, მისი სიტყვით გამოსვლა.
„სტრასბურგის ევროპული შეხვედრები" საჯარო ადმინისტრაციის ევროპული ცენტრისა და ფრანკოფონიის საერთაშორისო ორგანიზაციის ორგანიზებით ტარდება.
