იუსტიციის მინისტრი ქეშალოს საჯარო სკოლის მოსწავლეებს საქართველოს ევროპულ მომავალზე ესაუბრა

თარიღი: 23 დეკემბერი 2015
იუსტიციის მინისტრი ქეშალოში იმყოფებოდა, სადაც პროექტის − „მინისტრი ესაუბრება ახალგაზრდებს“ − ფარგლებში ადგილობრივი საჯარო სკოლის მოსწავლეებს შეხვდა. თეა წულუკიანი მოზარდებს საქართველოს ევროპული მომავლის შესახებ ესაუბრა.

იუსტიციის მინისტრი ევროკომისიის ანგარიშს გამოეხმაურა, რომლის თანახმად, საქართველომ შეასრულა სავიზო რეჟიმის ლიბერალიზაციის სამოქმედო გეგმის ყველა მოთხოვნა და სავიზო რეჟიმის ლიბერალიზაციის ტექნიკური პროცესი წარმატებით დაასრულა. თეა წულუკიანის თქმით, ეს ისტორიული გამარჯვებაა საქართველოსათვის; იმ დიდი შრომის შედეგია, რომელიც საქართველოს მთავრობამ და ქვეყნის თითოეულმა მოქალაქემ გასწია. მინისტრმა დეტალურად განუმარტა ახალგაზრდებს, თუ რა შესაძლებლობებს აჩენს ვიზალიბერალიზაციის პროცესის წარმატებით დასრულება საქართველოს მოქალაქეებისათვის და, კონკრეტულად, ახალგაზრდა თაობისათვის.

თეა წულუკიანმა იმ რეფორმებზეც ისაუბრა, რომლებიც   იუსტიციის სამინისტრომ განახორციელა საქართველოს ევროპული მომავლისათვის. იუსტიციის მინისტრის თქმით, განსაკუთრებით დიდი შრომა ჩაიდო ქართული კანონმდებლობის ევროპულ სამართალთან დაახლოებისა და უსაფრთხო დოკუმენტების მიმართულებებში.  მინისტრმა დეტალურად განუმარტა ახალგაზრდებს ის პროცედურები, რომელთა ამოწურვის შემდეგ საქართველოს მოქალაქეებს ევროპაში უვიზო მიმოსვლით სარგებლობის საშუალება ექნებათ.

როგორც იუსტიციის მინისტრმა განაცხადა, ევროკომისიის დასკვნა, რომელიც გასულ კვირას გამოქვეყნდა, კიდევ ერთი ნაბიჯია საქართველოს ევროპული მომავლისაკენ, თუმცა, ეს მხოლოდ „გაგრძელების დასაწყისია“ და საქართველოს მომავალ გამარჯვებებში ახალგაზრდა თაობა თავის წვლილს შეიტანს. შეხვედრის ბოლოს თეა წულუკიანმა მოსწავლეების კითხვებს უპასუხა. მინისტრმა მათ იუსტიციის სახლებში ტურის მოწყობა შესთავაზა, რომლის ფარგლებშიც ბავშვები შეძლებენ საქართველოს სხვადასხვა ქალაქის იუსტიციის სახლების დათვალიერებას და ამ ქალაქების ღირსშესანიშნაობების გაცნობას. თეა წულუკიანი  დაინტერესდა, საქართველოს რომელი კუთხის დათვალიერებას ისურვებდნენ მოზარდები და მათ სვანეთში ექსკურსია შესთავაზა. ეს არ იქნება პირველი შემთხვევა, როდესაც მინისტრი სვანეთში ეთნიკურად არაქართველ ბავშვებთან ერთად იმოგზაურებს − მიმდინარე წლის აგვისტოში ის უკვე სტუმრობდა საქართველოს მაღალმთიან რეგიონს ფოკის სკოლის მოსწავლეებთან ერთად.   

პროექტი „მინისტრი ესაუბრება ახალგაზრდებს“ თეა წულუკიანის ინიციატივაა, რომელიც 2015 წლის 1 ივნისიდან ხორციელდება. იუსტიციის მინისტრი პირადად ხვდება საჯარო სკოლის მოსწავლეებს, რომლებიც რეგიონებში ცხოვრობენ და სწავლობენ. საუბრის თემა ახალგაზრდებისათვის აქტუალური და საინტერესო საკითხებია: ქვეყნის ევროპული მომავალი, ევროპული  ღირებულებები და სხვ.