საქართველოს მთავარი პროკურატურის ანალიტიკურმა სამმართველომ 2009 წელს რეგისტრირებული დანაშაულის შესახებ სტატისტიკური მონაცემები გამოაქვეყნა. ანალიზი ჩატარდა მთელი საქართველოს მასშტაბით. არსებული მონაცემებით, 2008 წელთან შედარებით, 2009 წელს დანაშაულებზე წინასწარი გამოძიების დაწყების მაჩვენებელი შემცირდა 3.1%-ით, მათ შორის მძიმე კატეგორიის დანაშაული შემცირდა 26%-ით. საქართველოს მაშტაბით 10 ათას მოსახლეზე აღრიცხული დანაშაულის ოდენობა 2009 წელს ოთხი ერთეულით ნაკლები იყო 2008 წლის ანალოგიურ მონაცემზე.
საქართველოს იუსტიციის სამინისტროს ეროვნულ არქივს დღეს ეწვია აზერბაიჯანის რესპუბლიკის კულტურისა და ტურიზმის სამინისტროს სახელმწიფო კინოფონდის დელეგაცია, რომელსაც ფონდის დირექტორი ჯამილ გულიევი ხელმძღვანელობს. დელეგაციის წევრები ეროვნული არქივის გენერალურმა დირექტორმა თეონა იაშვილმა მიიღო. შეხვედრაზე ისაუბრეს თანამშრომლობის სამომავლო გეგმაზე და ერთობლივი პროექტების განხორციელებაზე. "ჩვენი სტუმრები დაინტერესებული არიან საქართველოს ეროვნული არქივის კინოფოტოფონოდოკუმენტების არქივში დაცული იმ აუდიო, კინო და ფოტომასალით, რომელიც აზერბაიჯანს ეხება.
იუსტიციის სამინისტროს სამოქალაქო რეესტრის სააგენტოს თავმჯდომარის მოადგილემ ლაშა ციმაკურიძემ დღეს ცესკოს მონაცემთა განახლებული ბაზა გადასცა. სამოქალაქო რეესტრის სააგენტო ვალდებულია, წელიწადში ოთხჯერ - ყოველი წლის 1 თებერვალს, 1 მაისს, 1 აგვისტოსა და 15 ნოემბერს საარჩევნო უფლების მქონე პირთა შესახებ განახლებული, ან ახალი მონაცემები გადასცეს ცესკოს. ამ მონაცემებში შედიან პირები, ვისაც არჩევნების დღისათვის უსრულდებათ 18 წელი, ასევე ინფორმაცია გარდაცვალებულთა შესახებ. კომისია ამ ინფორმაციას ამომრჩეველთა ერთიანი სიის გასაახლებლად იყენებს. ბოლოს ცესკოს სამოქალაქო რეესტრის სააგენტოს მონაცემთა ბაზა 1 თებერვალს გადაეცა.
საქართველოს იუსტიციის სამინისტროს ეროვნული არქივის ცენტრალურ საისტორიო არქივს კიდევ ერთი, სამეცნიერო და საზოგადოებრივ-პოლიტიკური მნიშვნელობის დოკუმენტები შეემატა. ქართველი ისტორიკოსისა და საზოგადო მოღვაწის, საქართველოს მეცნიერებათა აკადემიის ერთ-ერთი დამფუძნებლის, აკადემიკოს სიმონ ჯანაშიას პირადი არქივი მისმა ოჯახმა ეროვნულ არქივს უსასყიდლოდ გადასცა. ამ საკითხთან დაკავშირებით სიმონ ჯანაშიას ქალიშვილი რუსუდან ჯანაშია ეროვნულ არქივს ეწვია და ეროვნული არქივის გენერალურ დირექტორს თეონა იაშვილს შეხვდა. ეროვნული საარქივო ფონდისათვის გადაცემული დოკუმენტები მოიცავს სიმონ ჯანაშიას ხანმოკლე ცხოვრება-მოღვაწეობის ამსახველ მდიდარ დოკუმენტურ მასალას.
საქართველოს ნოტარიუსთა პალატის შეზღუდული შესაძლებლობების მქონე თანამშრომელი პალატის საქმიანობაში აქტიურად ჩაება. 18 წლის სალომე გარუჩავამ მიმდინარე წელს 140-მდე მოქალაქეს გაუწია კვალიფიციური სატელეფონო კონსულტაცია. იგი ნოტარიუსთა პალატამ 2009 წლის პირველი ოქტომბრიდან დაასაქმა. ნოტარიუსთა პალატაში დანერგილი თანამედროვე ტექნოლოგიების მეშვეობით სალომე, რომელსაც გადაადგილების უნარი შეზღუდული აქვს, მოქალაქეებს საკუთარი სახლიდან ემსახურება და მათ სანოტარო მოქმედებების ელექტრონულ რეესტრში არსებულ ინფორმაციას აწვდის. შესაბამისად, მოქალაქეები სანოტარო აქტების შესახებ მათთვის საჭირო ნებისმიერ ცნობას სახლიდან გაუსვლელად იღებენ.
პროკურატურის ინიციატივით, თბილისის საჯარო სკოლების მოსწავლეებს შორის მინი-ფეხბურთში ჩემპიონატი დაიწყო. ტურნირი 2010 წლის 13 მარტს, სპორტულ-გამაჯანსაღებელი კომპლექსის (ყოფილი "სკა") საფეხბურთო მოედანზე გაიხსნა. პირველ მატჩში მონაწილეობა პროკურორებმაც მიიღეს, თბილისის პროკურატურის თანამშრომლები მე-10 საჯარო სკოლის უფროსკლასელებს შეხვდნენ. მატჩი მოსწავლეთა გამარჯვებით - 5-2 დასრულდა. მოსწავლეთა შორის ჩემპიონატი მინი-ფეხბურთში დევიზით -"ახალგაზრდობა უდანაკარგოდ" არასრულწლოვანთა დანაშაულის პრევენციის კამპანიის ნაწილია, ტურნირი სამ თვეს გასტანს და გამარჯვებული სკოლა სასწავლო წლის დასრულებამდე გამოვლინდება. პირველ, მეორე და მესამე ადგილზე გასულები სიგელებსა და ფასიან საჩუქრებს მიიღებენ.
